માફ ન કરતો કોઈને, માફી માગું છું માત
આવ્યો તારે દ્વારે, કરવી છે મારે સઘળી વાત
લોભમાં લલચાઈને, દુઃખી કીધા અનેકને માત
આ સઘળાં કૃત્યે, હૈયે મચ્યો છે ઉત્પાત
રાતદિવસ બીજાને પાડવા, કરતો સતત વિચાર
એક દિવસ મારો આવશે, ચૂક્યો એ આચાર
ખાવા-પીવામાં ખૂબ મહાલવું, હૈયે રાખી આ એક વાત
બીજા ભૂખ્યા રહેતા હશે, એમાં પણ વસે તું માત
દુઃખી કરતો અન્યને, દુઃખી થાવું પડશે મારે માત
આ હું વીસરી ગયો, હવે થાય છે બહુ પશ્ચાત્તાપ
આંસુ નવ લૂછ્યાં કોઈનાં, આજે વહે છે મારે માત
માફ કરજે તું મુજને, માફી માગું છું હું માત
સદ્દગુરુ શ્રી દેવેન્દ્ર ઘીયા (કાકા)