ફેંકી એક નજર પ્યારભરી અમારા ઉપર તમે પ્રભુ, અમારી જાનમાં જાન આવી ગઈ
તમારી પ્યારભરી નજરથી, અમારા જીવનની ફૂલવાડીમાં બહાર આવી ગઈ
કરમાઈ ગયું હતું જીવન અમારું જગમાં, તમારી પ્રેમભરી નજરથી તાજગી આવી ગઈ
તમારી કરૂણાના બિંદુ જ્યાં પીધા જીવનમાં, હૈયાંમાં આનંદની લહેરી છવાઈ ગઈ
હસતું મુખડું તમારું રહ્યું છે હાસ્ય વરસાવતું, અમારા જીવનને જોમ આવી ગઈ
તમારા તેજના કિરણો મળ્યા જ્યાં જીવનમાં, અમારા જીવનની શકલ બદલાઈ ગઈ
નિઃસહાય એવા અમે, મળી ગયો જ્યાં સહારો તમારો, ઉમંગની હૈયાંમાં ભરતી આવી ગઈ
હૈયાંમાં તમારી જ્યાં યાદ આવી ગઈ, તન બદનમાં સ્ફૂર્તિ જીવનમાં છવાઈ ગઈ
મસ્તીભરી એક નજર ફેંકી જ્યાં અમારા ઉપર, દિલમાં હલચલ ત્યાં મચી ગઈ
એક સૌમ્યભરી નજર ફેંકી જ્યાં અમારા ઉપર, જીવનમાં તો એ શાંતિ આપી ગઈ
સદ્દગુરુ દેવેન્દ્ર ઘીયા (કાકા)