Hymn No. 541 | Date: 04-Oct-1986
|
|
|
Text Size |
 |
 |
ફરી ફરી મોકલી જગમાં કરી ઉપકાર, વાટ મારી રહી છે તું જોતી
ગુનેગાર તારો જ આ બાળ માડી, ગયો છે તુજ સામે આજે બેસી
ભૂલીને વાયદા બધા તુજને, રહી છે માયા હૈયે એને ખૂબ વાગી
ગુનેગાર તારો જ આ બાળ માડી, ગયો છે તુજ સામે આજે બેસી
કુકર્મોથી બન્યા છે કાળા હૈયા એના, સાફ કરવા એણે તસ્દી નથી કંઈ લીધી
ગુનેગાર તારો જ આ બાળ માડી, ગયો છે તુજ સામે આજે બેસી
વસંતો ને વસંતો ગઈ, નથી હૈયેથી એના, વાસના હજી કંઈ છૂટી
ગુનેગાર તારો જ આ બાળ માડી, ગયો છે તુજ સામે આજે બેસી
દીધું છે ભરપૂર સહુને તેં જગમાં, બેઠો છે તુજ સામે ફેલાવીને હાથ ખાલી
ગુનેગાર તારો જ આ બાળ માડી, ગયો છે તુજ સામે આજે બેસી
નથી વરસાવી દયા અન્ય પર, રહ્યો છે દયાની ભીખ તુજ પાસે માંગી
ગુનેગાર તારો જ આ બાળ માડી, ગયો છે તુજ સામે આજે બેસી
પાપો કરતા નથી પાછું વળી કંઈ જોયું, પ્રપંચોમાં સદા રહ્યો છે રાચી
ગુનેગાર તારો જ આ બાળ માડી, ગયો છે તુજ સામે આજે બેસી
રડાવી, રડાવી અન્યને રહ્યો છે રાજી, થઈ આજ એનીજ આંખ અશ્રુભીની
ગુનેગાર તારો જ આ બાળ માડી, ગયો છે તુજ સામે આજે બેસી
વિશ્વાસે બેસી ગયો છે આજ તુજ સામે, માફ કરશે આજ તુજ એને માડી
ગુનેગાર તારો જ આ બાળ માડી, ગયો છે તુજ સામે આજે બેસી
સદ્દગુરુ દેવેન્દ્ર ઘીયા (કાકા)
|
|