Hymn No. 468 | Date: 14-Jun-1986
|
|
|
Text Size |
 |
 |
પ્રભુ આપે કે ન આપે, તોયે તૂટે ના જેનો વિશ્વાસ
એવા ભક્તનો આ સંસારમાં, પ્રભુ થાયે સદાયે દાસ
શ્વાસે શ્વાસે નામ રટે, ને શ્વાસ નામ વિના ખાલી ના જાય
એવા ભક્તનો આ સંસારમાં પ્રભુ થાયે સદાયે દાસ
આપવા પ્રભુ આવે પાસે, તોયે જાવું પડે ખાલી હાથ
એવા ભક્તનો આ સંસારમાં, પ્રભુ થાયે સદાયે દાસ
વર્તે જગમાં એ તો એવી રીતે, ભૂલથી પ્રભુને ના પડે ત્રાસ
એવા ભક્તનો આ સંસારમાં, પ્રભુ થાયે સદાયે દાસ
સેવા કરતો જ્યાં અન્યની, પ્રભુ એને એમાં દેખાય
એવા ભક્તનો આ સંસારમાં, પ્રભુ થાયે સદાયે દાસ
કામ ક્રોધ ત્યજી દીધાં છે, કામ ક્રોધની કીધી છે રાખ
એવા ભક્તનો આ સંસારમાં, પ્રભુ થાયે સદાયે દાસ
લેવું નથી જ્યાં અન્યની પાસે, દેવા એ સદાયે તૈયાર
એવા ભક્તનો આ સંસારમાં, પ્રભુ થાયે સદાયે દાસ
દુઃખ પોતાનું ભૂલી જઈ જે અન્યના દુઃખે દુઃખી થાય
એવા ભક્તનો આ સંસારમાં, પ્રભુ થાયે સદાયે દાસ
મીઠાસ વાણી ને હૈયામાં એવી, સાકર પાછી પડી જાય
એવા ભક્તનો આ સંસારમાં, પ્રભુ થાયે સદાયે દાસ
મુક્તિની જેને ઝંખના નથી ત્યાં મુક્તિ મુક્ત બની જાય
એવા ભક્તનો આ સંસારમાં, પ્રભુ થાયે સદાયે દાસ
સદ્દગુરુ દેવેન્દ્ર ઘીયા (કાકા)
|
|