Hymn No. 374 | Date: 19-Feb-1986
|
|
|
Text Size |
 |
 |
ઝાંઝરના ઝમકાર વાગ્યાં, સૂતા દેવલોક જાગ્યાં,
રમવાને રાસ માડી, એ તો અવનિ પર આવ્યાં
આંખે અમીરસ ભર્યાં, હૈયામાં ભાવો છલકાયાં,
રમવાને રાસ માડી, એ તો અવનિ પર આવ્યાં
અનેરા તાલો લેવાયાં, પગલે પગલે કંકુ વેરાણા,
રમવાને રાસ માડી, એ તો અવનિ પર આવ્યાં
અનોખા તેજ પથરાયાં, ભાનુદેવ ઝાંખા દેખાયા,
રમવાને રાસ માડી, એ તો અવનિ પર આવ્યાં
અનેરા રંગો રેલાયાં, હૈયે ઉલ્લાસ ન માંયા,
રમવાને રાસ માડી, એ તો અવનિ પર આવ્યાં
અણુ અણુએ આનંદ રેલાયાં, હૈયે ઉમંગ ઊભરાયા,
રમવાને રાસ માડી, એ તો અવનિ પર આવ્યા
સૌના સાનભાન ભુલાયા, હૈયે આનંદ લહેરાયા,
રમવાને રાસ માડી, એ તો અવનિ પર આવ્યાં
દર્શન માટે સૌ અધીરા દેખાયાં, વેરઝેર ત્યાં ભુલાયા,
રમવાને રાસ માડી, એ તો અવનિ પર આવ્યાં
માએ અમીના છાંટણાં છાંટયાં, એની કૃપામાં સૌ નાહ્યા,
રમવાને રાસ માડી, એ તો અવનિ પર આવ્યાં
સદ્દગુરુ દેવેન્દ્ર ઘીયા (કાકા)
|
|