ઘૂઘવાતોને ઘૂઘવાતો જાય, સાગર તો મસ્તીમાં, ઘૂઘવાતોને ઘૂઘવાતો જાય
નિરંતર એની મસ્તીમાં ઘૂઘવાતો જાય, મર્યાદા ના તોયે એ તો વીસરી જાય
યુગોથી રહ્યો છે ઘૂઘવાતો એની મસ્તીમાં, અટક્યો ના એમાં એ તો જરાય
રહ્યો ધરતી પાસેથી બધું સ્વીકારતો, ના અભિમાનમાં કદી એ તો ફુલાય
તારા હૈયાંના પ્રેમના સાગરને બનાવજે તું વિશાળ, જગ સારું એમાં સમાવી લેવાય
સંસારવિષ પણ ભળે જ્યાં એમાં, અમૃત એ પણ તો બની જાય
સાગરમાં જે આવે તે સમાઈ જાય, હોય ના તૈયાર ભળવા, કિનારે ફેંકાઈ જાય
પ્રેમનો સાગર રાખજે તારો એવો, જે આવે એમાં એ તો સમાઈ જાય
ઊછળે મોજા તો એવા એના, તરે જે એમાં, થાક એનો એમાં ઊતરતો જાય
તારા પ્રેમના સાગરમાં નવરાવજે સહુને, સહુ એમાં તો પ્રફુલ્લિત બનતા જાય
સદ્દગુરુ શ્રી દેવેન્દ્ર ઘીયા (કાકા)